កូវីដ-១៩, សង្រ្គាម និងការប្រែប្រួលអាកាសធាតុបង្កឱ្យមានការបារម្ភពីវិបត្តិស្បៀងអាហាររឹតតែខ្លាំង

(ប៉ារីស)៖ ការខូចខាតសេដ្ឋកិច្ចដោយជំងឺឆ្លងរាតត្បាតពិភពលោក (COVID-19) ក៏ដូចជាសង្គ្រាម-ជម្លោះប្រដាប់អាវុធ និងបញ្ហាបម្រែបម្រួលអាកាសធាតុ កំពុងជំរុញឱ្យមានការភ័យព្រួយកាន់តែខ្លាំងលើសុវត្ថិភាព និងសន្តិសុខស្បៀងអាហារ ដោយកាលពីឆ្នាំ២០២០កន្លងទៅនេះ វាបានឈានដល់កម្រិតខ្ពស់បំផុត មិនធ្លាប់មានក្នុងរយៈពេល ០៥ឆ្នាំ។

របាយការណ៍របស់សហភាពអ៊ឺរ៉ុប, អង្គការស្បៀងអាហារ និងកសិកម្ម (FAO) និងកម្មវិធីស្បៀងអាហារពិភពលោក ដែលកំពុងតាមដានស្ថានការណ៍ វិវឌ្ឍកាន់តែអាក្រក់ខាងលើនេះ បានបង្ហាញឱ្យដឹងទៀតថា កាលពីឆ្នាំ២០២០ ប្រជាជនចំនួន ១៥៥លាននាក់នៅក្នុងប្រទេសចំនួន ៥៥ បានប្រឈមនឹងកង្វះខាតស្បៀងអាហារធ្ងន់ធ្ងរ ពោលគឺមានចំនួន ២០លាននាក់ច្រើនជាងកាលពីឆ្នាំ២០១៩។

កាលពីឆ្នាំ២០២០ ប្រទេសមួយចំនួន ដែលបានជួបវិបត្តិស្បៀងអាហារ ធ្ងន់ធ្ងរជាងគេបំផុតនោះគឺ សាធារណរដ្ឋប្រជាធិបតេយ្យប្រជាមានិតកុងហ្គោ (DR Congo), ប្រទេសយ៉េមែន (Yemen) និងប្រទេសអាហ្វហ្គានីស្ថាន (Afghanistan)៕

CNA៖ ថ្ងៃទី០៦ ខែឧសភា ឆ្នាំ២០២១