​ឪពុកចុងចិត្តអប្រិយ ចាប់រំលោភកូនស្រី ជាច្រើនដង និងគំរាមសម្លាប់

បុរស​វ័យ ​៥០ ​ប្លាយ​ឆ្នាំ​ម្នាក់ ត្រូវបាន​កម្លាំង​សមត្ថកិច្ច​ឃាត់ខ្លួន​បញ្ជូន​ទៅកាន់​ស្នងការដ្ឋាននគរបាល​ខេត្ត បន្ទាប់ពី​ធ្លាយ​អាថ៌កំបាំង ក្នុងករណី​រំលោភ​កូនស្រីចុង​របស់ខ្លួន​ជាច្រើនលើក​ច្រើនសារួចមក​។​

ការឃាត់ខ្លួន​នេះ​បានធ្វើ​ឡើង​ កាលពី​ល្ងាច​ថ្ងៃទី​ ១៦ ខែមករា ឆ្នាំ​ ២០២២ នៅ​ចំណុច​ភូមិ​អូរ​តា​សុខ ឃុំ​ពេជ្រ​ចិន្តា ស្រុក​ភ្នំព្រឹក ខេត្តបាត់ដំបង​។​

យោង​តាម​ពាក្យបណ្តឹង​របស់​ស្ត្រី​ឈ្មោះ សំ មាន អាយុ​ ៣៩ ​ឆ្នាំ ត្រូវជា​ម្តាយ​ក្មេងស្រី​រងគ្រោះ​បាន​អះអាងថា កាលពីថ្ងៃទី​១៥ ខែមករា វេលា​ម៉ោង ៦ ល្ងាច ដោយ​ឃើញ​កូនស្រី​ឈ្មោះ ឌ ស ភ អាយុ​ ១៤ ​ឆ្នាំ មាន​អាការប្លែក ក៏បាន​ហៅ​មក​សួរ ទើប​កូនស្រី​ប្រាប់ថា ប្តី​ម៉ែ​ឯង (​ឪពុកចុង​) ចាប់រំលោភ​ជាច្រើន​ដង​មកហើយ ដោយបាន​គំរាម​សម្លាប់​ទៀតផង​បើ​នាង​ហ៊ាន​និយាយប្រាប់​ម្តាយ ឬ​ប្រាប់​អ្នកជិតខាង​។ ពេលលឺដូចនេះស្ត្រី​ជា​ម្តាយ​បាន​ប្តឹងទៅ​សមត្ថកិច្ច​អោយ​ឃាត់ខ្លួន​តែម្តង​។

នៅ​ចំពោះមុខ​សមត្ថកិច្ចជនសង្ស័យ​ឈ្មោះ ប៊ុត រឿ​ត អាយុ​ ៥២ ​ឆ្នាំ បាន​សារភាពថា បាន​ដេក​ជាមួយ​កូនស្រី​បានសម្រេច​ចំនួន ១២ លើក​មកហើយ​។

បច្ចុប្បន្ន​ជនសង្ស័យ​ត្រូវបាន​កម្លាំង​សមត្ថកិច្ច​រៀបចំ​បញ្ជូន​ទៅកាន់​ការិយាល័យ​ជំនាញ​ហើយ ដើម្បី​ចាត់ការ​បន្ត៕